Adil Hayat
sukun-e-dil fana hai aur main huun
ghamon ka qafila hai aur main huun
kahani kah rahi hai raat apni
muqabil aaina hai aur main huun
nisab-e-gardish-e-sham-o-sahar hai
sar-e-rah hadisa hai aur main huun
kahun kya hasti-e-na-moatabar huun
tira hi aasra hai aur main huun
vahi nairangi-e-rang-e-zamana
vahi dil ki sada hai aur main huun
agarche jism rakhta huun main ‘adil’
badan sar se juda hai aur main huun
Leave a Reply