jab us ko dekhte rahne se thakne lagta huun
to apne ḳhvab ki palken jhapakne lagta huun
jise bhi pyaas bujhani ho mere paas rahe
kabhi bhi apne labon se chhalakne lagta huun
hava-e-hijr dikhati hai sabz bagh-e-visal
to bagh-e-vahm men apne mahakne lagta huun
chhiḌakni paḌti hai ḳhud par kisi badan ki aag
main apni aag men jab bhi dahakne lagta huun
main ḳhud ko chakh nahin paata ki toḌ leti hai
mujhe hava-e-ḳhizan jab bhi pakne lagta huun
badan ki kaan se hiire nikalne lagte hain
main apni raat men aksar chamakne lagta huun
vo ek manzar-e-napaid hai ki jis ke liye
main aankh hone ki ḳhatir phaḌakne lagta huun
parinde bolne lagte hain mujh men raat ga.e
to shaḳh-e-sher pe main bhi chahakne lagta huun
jo kar-nama kabhi koi mujh se ho jaa.e
to apni piiTh main ḳhud hi thapakne lagta huun
sunane lagta hai ash.ar-e-ishq jab ‘ehsas’
main us ke samne dil sa dhaḌakne lagta huun
Leave a Reply