ji nahin lagta kitabon men kitaben kya karen
kya paḌhen paḌh kar bujhi be-nur satren kya karen
kuchh ajab halat hai ai dil kuchh samajh aata nahin
so rahen ghar ja ke ya galiyon men ghumen kya karen
vasta patthar se paḌ jaa.e jahan sochun vahan
kya karen zor-e-bayan qalamen davaten kya karen
aisi yaḳh-basta hava men konplen phuTengi kyaa?
barishon ki aarzu be-barg shaḳhen kya karen
ho ga.i daldal zamin dhanste hi rah jaate hain yaan
kya karen mohkam bina.en surḳh inTen kya karen
shaam Dhalte hi ye aalam hai to kya jaane bashir
haal apna sub.h tak be-rabt nabzen kya karen
Leave a Reply