Safi Aurangabadi
ab na vo ham hain na vo pyaar ki surat teri
na vo halat hai hamari na vo halat teri
dekh li dekh li bas ham ne tabi.at teri
ho na dushman ke bhi dushman ko mohabbat teri
kya gharaz us se ho dushman pe inayat teri
ham to jiite hain faqat dekh ke surat teri
ye bhi aa jaati hai jab dekh li surat teri
sach hai ulfat nahin munh dekhe ki ulfat teri
tark-e-ulfat hi nahin qat-e-ta.alluq bhi kya
phir bhi jaati nahin zalim ye mohabbat teri
daḳhl hoga na kabhi jis men gunahgaron ka
hogi ai va.iz-e-kaj-fahm vo jannat teri
chahne valon ka hangama kisi din hoga
ek din tujh ko rula.ega ye surat teri
ye taḌap ye tiri fariyad ye hasrat ai dil
kaash aa jaa.e miri jaan pe aafat teri
pahle kuchh aur hi tevar the ye tevar tere
pahle kuchh aur hi surat thi ye surat teri
dekhne valon ki ik bhiiḌ raha karti thi
uf re vo husn tira haa.e vo surat teri
us pe hairat hai baḌi mujh ko ta.ajjub hai bahut
ghair phir ghair ke dil men ho mohabbat teri
aadmi ki tujhe pahchan nahin ai zalim
ham to karte hain tire munh pe shikayat teri
tujh ko dilbar jo banaya to banaya ham ne
varna ma.alum hai duniya ko haqiqat teri
jaan de di na agar main ne to kuchh bhi na kiya
aap kahte hi rahen kya hai haqiqat teri
chain aata hi na tha tujh ko hasinon ke baghair
ai safi’ kya hui agli vo tabi.at teri
Leave a Reply