Poet
kisi ki nek ho ya bad jahan men khu nahin chhupti
chhupae laakh khushbu ya koi badbu nahin chhupti
zaban par jab talak aati nahin albatta chhupti hai
zaban par jab ki aai baat ai gul-ru nahin chhupti
yahan to tujh ko sau parde lage hain ahl-e-taqva se
bhala rindon se kyuun ai dukhtar-e-raz tu nahin chhupti
saliqa kya kare is men koi betabi-e-jan ko
chhupao sau tarah jab dil ho be-qabu nahin chhupti
hijab us men kahan hai be-hijabi jis ki aadat ho
chhupa kar laakh piive gar koi daaru nahin chhupti
rukh-e-raushan ko tum kyuun chhod kar zulfen chhupate ho
chamak rukh ki chhupae se tah-e-gesu nahin chhupti
ye riish o jubba o dastar zahid ki banavat hai
tabiat be-takalluf jis ki ho yaksu nahin chhupti
kalam apna abas tu ahl-e-danish se chhupata hai
jahan men ‘aish’ tarz-e-shair-e-khush-go nahin chhupti
Leave a Reply