ham chaTanon ki tarah sahil pe Dhale ja.enge
phir hamen sailab ke dhare baha le ja.enge
aisi rut aa.i andhere ban ga.e mimbar ke but
gumbad-o-mehrab kya jugnu bacha le ja.enge
pahle sab ta.amir karva.enge kaghaz ke makan
phir hava ke ruḳh pe angare uchhale ja.enge
ham vafadaron men hain us ke magar mashkuk hain
ik na ik din us ki mahfil se nikale ja.enge
jang men le ja.enge sarhad pe sab tir-o-tafang
ham to apne saath miTTi ki dua le ja.enge
shahr ko tahzib ke jhonkon ne nanga kar diya
gaanv ke sar ka dupaTTa bhi uḌa le ja.enge
dastan-e-ishq ko ‘bekal’ na de giton ka ruup
dost hain bebak sab lahje chura le ja.enge
Leave a Reply