shab men din ka bojh uThaya din men shab-bedari ki
dil par dil ki zarb laga.i ek mohabbat jaari ki
kashti ko kashti kah dena mumkin tha asan na tha
dariyaon ki ḳhaak uḌaa.i mallahon se yaari ki
koi had koi andaza kab tak karte jaana hai
ḳhandaq se ḳhamoshi gahri us se gahri tariki
ik tasvir mukammal kar ke un ankhon se Darta huun
faslen pak jaane par jaise dahshat ik chingari ki
ham insaf nahin kar paa.e duniya se bhi dil se bhi
teri janib muḌ kar dekha ya.ani janib-dari ki
ḳhvab adhure rah jaate hain niind mukammal hone se
aadhe jaage aadhe so.e ghaflat bhar hushyari ki
jitna in se bhaag raha huun utna pichhe aati hain
ek sada jarob-kashi ki ik avaz bhikari ki
apne aap ko gaali de kar ghuur raha huun taale ko
almari men bhuul gaya huun phir chabi almari ki
ghaTte baḌhte saa.e se ‘adil’ lutf uThaya saara din
angan ki divar pe baiThe ham ne ḳhuub savari ki
Leave a Reply