Josh Malihabadi
saari duniya hai ek parda-e-raz
uf re tere hijab ke andaz
maut ko ahl-e-dil samajhte hain
zindagani-e-ishq ka aghaz
mar ke paaya shahid ka rutba
meri is zindagi ki umr daraz
koi aaya tiri jhalak dekhi
koi bola suni tiri avaz
ham se kya puchhte ho ham kya hain
ik bayaban men gum-shuda avaz
tere anvar se labalab hai
dil ka sab se amiiq gosha-e-raz
aa rahi hai sada-e-hatif-e-ghaib
‘josh’ hamta-e-hafiz-e-shiraz
Leave a Reply