Ajiz Matvi
main iztirab men huun shaam se sahar ke liye
koi charagh ata kar de rat-bhar ke liye
ḳhuda bachae tumhen aisi-vaisi nazron se
gale men daal lo ta.aviz tum nazar ke liye
qafas-nasib hain na-ashna-e-azadi
ye qaid ek chunauti hai bal-o-par ke liye
nigah-e-barq men vo ḳhaar se khaTakne lage
jo tinke jam.a kiye ham ne apne ghar ke liye
masih-e-vaqt to aisi nafas sahi lekin
ilaaj hai koi zaḳhm-e-dil-o-jigar ke liye
tumhare husn-o-ada ke hamin shikar nahin
na jaane kitnon ke dil tum ne ban-sanvar ke liye
tamam-umr andhere men kaT gai yarab
koi charagh ata kar hamare ghar ke liye
kisi ke samne sar ḳham karun main kyuun ‘ajiz’
bani hai meri jabin un ke sang-e-dar ke liye
Leave a Reply