Rasheed Qaisrani
sadiyon se main is aankh ki putli men chhupa tha
palkon pe agar mujh ko saja lete to kya tha
tu phail gaya ta-ba-abad mujh se bichhaḌ kar
main jism ke zindan men tujhe DhunD raha tha
haan mujh ko tire surḳh kajave ki qasam hai
is raah men pahle koi ghungru na baja tha
guzre the mire samne tum dosh-e-hava par
main duur kahin ret ke Tiile pe khaḌa tha
siine men ubharte hue suraj ka talatum
ankhon men tiri Dubti raton ka nasha tha
guzra na udhar se koi patthar ka pujari
muddat se main us raah ke mathe pe saja tha
jab vaqt ki dahliz pe shab kaanp rahi thi
sho.ala sa mire jism ke angan se uTha tha
ab janiye kya naqsh havaon ne bana.e
us ret pe main ne to tira naam likha tha
ai dida-e-hairan tu zara aur qarib aa
ai DhunDne vaale main tujhe DhunD raha tha
achchha hai ‘rashid’ aankh bhar aa.i hai kisi ki
is ḳhushk samundar men to main Duub chala tha
Leave a Reply