Rang-O-Ramish Zamzame Gul-Ha-E-Tar Hote Hue

Khalid Mahmood

rang-o-ramish zamzame gul-ha-e-tar hote hue

dil akela aur itne ham-safar hote hue

ansuon se sard ho jaati hai har siine ki aag

mera dil atish-kada hai chashm-tar hote hue

dil ki duniya men andhera ho to kuchh raushan nahin

aankh chashm-e-sang hai shams o qamar hote hue

chashm aage ek chehra paanv go chakkar men hain

dar-ba-dar hota nahin dil dar-ba-dar hote hue

hausla TuuTa to vo ibrat ka manzar aa gaya

uḌ nahin paaya parinda bal-o-par hote hue

nisf duniya bhuuk se aur pyaas se maghlub hai

dast o baazu zehn o dil la.al-o-gohar hote hue

har kas-o-na-kas pe kar leta hai fauran e’tibar

be-ḳhabar kitna hai ‘ḳhalid’ ba-ḳhabar hote hue