Makhmoor Jalandhari
ham aql pe ulfat men bharosa nahin karte
jab karte hain kuchh kaam to socha nahin karte
ḳhud jagte hain rakhte hain taron ko bhi bedar
be-kar shab-e-hijr guzara nahin karte
vo jin ko yaqin husn-e-daraḳhshan pe hai apne
kyuun dil ke andhere men ujala nahin karte
ham dekhte hain roz mah-o-mehr ka jalva
kis roz tire ruḳh ka tamasha nahin karte
vo jin ki nigahon men hai namus-e-mohabbat
be-parda bhi ho koi to dekha nahin karte
gham kya mutahammil jo nahin meri nazar ke
vo mere tasavvur se to parda nahin karte
hain naam se ‘maḳhmur’ ke mash.hur-e-zamana
go ham kabhi shaghl-e-mai-o-mina nahin karte
Leave a Reply