main darta huun
apne paas ki chizon ko
chhu kar shairi bana dene se
roti ko main ne chhua
aur bhuuk shairi ban gai
ungli chaqu se kat gai
aur khuun shairi ban gaya
gilas haath se gir kar tuut gaya
aur bahut si nazmen ban gaiin
main darta huun
apne se thodi duur ki chizon ko
dekh kar shairi bana dene se
darakht ko main ne dekha
aur chhanv shairi ban gai
chhat se main ne jhanka
aur sidhiyan shairi ban gaiin
ibadat-khane par main ne nigah daali
aur khuda shairi ban gaya
main darta huun
apne se duur ki chizon ko
soch kar shairi bana dene se
main darta huun
tumhen soch kar
dekh kar
chhu kar
shairi bana dene se
Leave a Reply