Urooj Qadri
ho jaate hain jab apne marizon se ḳhafa aur
karte hain vo ijad sitam aur jafa aur
ai zulm sarapa kabhi is par bhi nazar kar
kya mera ḳhuda aur hai tera hai ḳhuda aur
mushkil hai batana ki hai kya farq magar hai
laila ki ada aur hai majnun ki ada aur
taslim ki duniya hi men hai jail bhi lekin
andar ki faza aur hai bahar ki faza aur
kahta hai ye qaidi ki hava ek nahin hai
bahar ki hava aur hai andar ki hava aur
momin ke liye jail hai duniya-e-duni bhi
duniya ki faza aur hai uqba ki faza aur
bimar-e-masarrat ki dava aish ki lazzat
bimar-e-mohabbat ka maraz aur dava aur
allah kare tujh ko tire nuur se agah
mahfil ka diya aur tire dil ka diya aur
anjam-e-mohabbat se uruuj apne hai vaqif
ta-zist hai qismat men jafa aur bala aur
Leave a Reply