Talib Baghpati
ḳhamosh andheri raton men jab saari duniya suuti hai
ik hijr ka maara rota hai aur shabnam aansu dhoti hai
pahle to mohabbat rafta rafta hosh-o-ḳhirad ko khoti hai
phir yaad kisi ki aa aa kar kanTe se dil men chubhoti hai
kuchh sochta huun kuchh kahta huun kuchh kahte hain kuchh sunta huun
jab un ke samne hota huun meri ye halat hoti hai
charagar bas ye batla de vo jab mujh se chhu jaate hain
kyuun jism men maujen uThti hain kyuun nabz men sur.at hoti hai
sab kahte hain main divana huun hain kahta huun sab divane hain
main duniya-bhar par hansta huun duniya-bhar mujh par roti hai
jab chand ufuq par hota hai aur taare jhilmil karte hain
ankhon men kisi ki bholi bholi shakl sama.i hoti hai
ummid se rishta TuuT gaya tum kya chhuTe dil chhuT gaya
armanon ki baḌhti kheti ko sail-e-yas Duboti hai
dil ek na ik din jaana tha ye din bhi aḳhir aana tha
‘talib’ tum is ka gham na karo ye chiiz para.i hoti hai
Leave a Reply