abu-mohammad-sahar

Sab Ki Aaankhon Mein Jo Samaya Tha

sab ki aankhon men jo samaya tha

kaun tha vo kahan se aaya tha

kis ne ki aaj pursish-e-ahval

koi apna tha ya paraya tha

mit gae ham to ye hua maalum

bhuul kar koi muskuraya tha

ek lazzat thi khud-farebi men

varna kis ne fareb khaya tha

aa gaiin yaad phir vahi baten

kal ba-mushkil jinhen bhulaya tha

sab the aseb-e-bazm ke maare

ham pe tanhaiyon ka saaya tha

umr guzri ‘sahar’ mohabbat men

ham ne dil kuchh ajiib paaya tha

More Poems

Leave a Comment