majbur-e-iltifat bhi honge jafa ke baad
aata hai inqalab agar intiha ke baad
sab ko na.e na.e se ujalon ki fikr hai
tahrik-e-ehtiyat chali hai hava ke baad
maazi ka tazkira hai na ab fikr-e-hal hai
bedar ho gaya huun main kis ki sada ke baad
paate hain la-shu.ur men ham qalb-e-mahiyat
ehsas kuchh latif hai itna saza ke baad
dushvar us pe ho ga.i kuchh aur dastaras
jab tajziya kiya hai asar ka dua ke baad
vo din ga.e ki ḳhak-nashinon ke dost the
ab to samajh rahe hain vo ḳhud ko ḳhuda ke baad
tauhin-e-arzu hai jahan-e-shu.ur men
tark-e-vafa ka vahm bhi azm-e-vafa ke baad
jiine ki ik umiid to paida hui ‘nazar’
dil mutma.in hamen nazar aaya jafa ke baad
Leave a Reply