apnon se shikayat hai na ghairon se gila hai
pahunchega jo qismat men gham-o-ranj likha hai
kis ki nigah-e-shauq hai mushtaq-e-tajalli
kyon jalva-e-paiham men vo namus-e-haya hai
girta to huun saaqi ke qadam par nahin malum
ye sajda-e-rindana hai ya laghzish-e-pa hai
bachte nahin dekha kabhi majruh-e-mohabbat
yarab nigah-e-naz hai ya tir-e-qaza hai
vo shoḳh sitam-kesh to naseh hai jafa-kosh
bimar-e-mohabbat ka madad-gar ḳhuda hai
marne ka nahin gham mujhe miTne ka nahin ranj
kuchh pas-e-mohabbat hai kuchh andoh-e-vafa hai
ye sadgi-e-husn hai ya naz-e-taghaful
divane se kahte hain ki divana hua hai
Leave a Reply