kise ḳhabar hai ki umr bas us pe ghaur karne men kaT rahi hai
ki ye udasi hamare jismon se kis ḳhushi men lipaT rahi hai
ajiib dukh hai ham us ke ho kar bhi us ko chhune se Dar rahe hain
ajiib dukh hai hamare hisse ki aag auron men baT rahi hai
main us ko har roz bas yahi ek jhuuT sunne ko phone karta
suno yahan koi mas.ala hai tumhari avaz kaT rahi hai
mujh aise peḌon ke sukhne aur sabz hone se kya kisi ko
ye bel shayad kisi musibat men hai jo mujh se lipaT rahi hai
ye vaqt aane pe apni aulad apne ajdad bech degi
jo fauj dushman ko apna salar girvi rakh kar palaT rahi hai
so is ta.alluq men jo ghalat-fahmiyan thiin ab duur ho rahi hain
ruki hui gaḌiyon ke chalne ka vaqt hai dhundh chhaT rahi hai
Leave a Reply