Sardar Khan Soz
ab vo ham se mila nahin karte
ham bhi koi gila nahin karte
zaḳhm-e-dil bharte bharte bharte hain
itni jaldi bhara nahin karte
log vo shaḳh kaaT dete hain
phuul jis par khila nahin karte
mat bujhao diye umidon ke
ye diye phir jala nahin karte
ek muddat se vo nahin aa.e
ham bhi ab hausla nahin karte
aag bujhti hai dil ki rone se
daagh dil ke dhula nahin karte
jag men un ka bhala nahin hota
jo kisi ka bhala nahin karte
chaal duniya ko jo nahin bhati
chaal aisi chala nahin karte
rafta rafta bahar aati hai
phuul yak dam khila nahin karte
haan sahar ho to Duub jaate hain
shab ko taare Dhala nahin karte
‘soz’ ham na-sipas logon par
raz-e-hasti khula nahin karte
Leave a Reply