band dariche suuni galiyan an-dekhe anjane log
kis nagri men aa nikle hain ‘sajid’ ham divane log
ek hami na-vaqif thahre rup-nagar ki galiyon se
bhes badal kar milne vaale sab jane-pahchane log
din ko raat kahen so bar-haq subh ko shaam kahen so khuub
aap ki baat ka kahna hi kya aap hue farzane log
shikva kya aur kaisi shikayat akhir kuchh buniyad to ho
tum par mera haq hi kya hai tum thahre begane log
shahr kahan khali rahta hai ye dariya har-dam bahta hai
aur bahut se mil jaenge ham aise divane log
suna hai us ke ahd-e-vafa men hava bhi muft nahin milti
un galiyon men har har saans pe bharte hain jurmane log
Leave a Reply