jab us se tark-e-mulaqat ka irada kiya
tab us ne daman-e-dil ko zara kushada kiya
bas ik nigah se us ki sada rahe maḳhmur
kabhi na jaam uThaya na shaghl-e-bada kiya
fareb de ke bhi us ka qusur kam hi raha
ki ham ne us pe bharosa bhi kuchh ziyada kiya
sharafat aur najabat ka is ko gharra hai
hasab nasab se siva zikr-e-ḳhanvada kiya
jahan-e-sher-o-adab men hamara zikr bhi hai
ki ham ne ‘mir’ se ‘ghalib’ se istifada kiya
miri ghayur tabi.at pe us ko hairat hai
ki arz-e-shauq ka us se na phir i.aada kiya
ye aur baat ki nakamiyan muqaddar thiin
‘habab’ jo bhi kiya ham ne bil-irada kiya
Leave a Reply