gunahon se nashv-o-numa pa gaya dil
dar-e-puḳhta-kari pe pahuncha gaya dil
agar zindagi muḳhtasar thi to phir kya
isi men bahut aish karta gaya dil
ye nannhi si vus.at ye nadan hasti
na.e se naya bhed kahta gaya dil
na tha koi ma.abud par rafta rafta
ḳhud apna hi ma.abud banta gaya dil
nahin girya o ḳhanda men farq koi
jo rota gaya dil to hansta gaya dil
baja.e dil ik talḳh aansu rahega
agar un ki mahfil men aaya gaya dil
pareshan raha aap to fikr kya hai
mila jis se bhi us ko bahla gaya dil
ka.i raaz pinhan hain lekin khulenge
agar hashr ke roz pakḌa gaya dil
bahut ham bhi chalak bante the lekin
hamen baton baton men bahka gaya dil
kahi baat jab kaam ki ‘mira-ji’ ne
vahin baat ko jhaT se palTa gaya dil
Leave a Reply