raat ne apni mehrban bahen phaila diin
aur siskiyon ka javar bhata tarikiyon se lipat gaya
tasviron ko pahchanne vaale dilon ke dipak bujhte gae
aur un saari anjan tasviron ke darmiyan
hairan ankhen hain
aur siskiyon ka javar bhata
siskiyan jinhen zindagi ke tavil dinon ne panah na di
aur kirnon par bhagte hue
kisi ne nahin socha
nasheb men ghatiyon ke darmiyan raat thaharti hai
kam aql musafir qadmon ki samajh men na aaya
ki zindagi charindon aur hadd-e-nigah tak phaili ghaas ka muahida nahin hai
avaz ki samten mutaayyan ho gaiin
aur taqlid ke aaseb lafzon ke pak-daman sayyaron ko raundte chale gae
anthak mehnaton ki samajh men kuchh na aaya
yahan tak ki soch ki sunahri raushaniyan thak kar gir paden
nasheb aur nasheb ki janib
junun ka nasheb
jahan raat thaharti hai
aur pur-asrariyat ka saneha
jahan sarabon ke asrar khul gae
aur jahan musafir qadmon aur anthak mehnaton aur siskiyon ke javar bhata ki dosti hai
ye raat ka padav hai jahan
ankhon ki tamam an-ginat sadken
ḳhuda hafiz ki bhuul bhulayyon men gum ho jaati hain