na muravvat hai na ulfat na vafa mere ba.ad
mera sarmaya bhi duniya se uTha mere ba.ad
bazm-e-matam hi men aa jaao zara mere ba.ad
chahiye kuchh to tumhen pas-e-vafa mere ba.ad
sham-e-madfan se ulajhti hai saba mere ba.ad
kaisi bigḌi hai zamane ki hava mere ba.ad
charḳh kam-zarf hai sar-garm-e-jafa mere ba.ad
us ko marqad bhi khaTakta hai mira mere ba.ad
kaun leta tha gham-e-arz-o-sama mere ba.ad
marne vaala koi paida na hua mere ba.ad
haa.e phir bhi na miTa un ki tabi.at ka ghubar
kar chuke ḳhaak miri vaqf-e-saba mere ba.ad
husn ka dekhne vaala koi baaqi na raha
kis se karte ho tum ab sharm-o-haya mere ba.ad
tum ne do phuul to madfan pe chaḌha.e hote
tum se itna bhi kabhi ho na saka mere ba.ad
ho gaya qais ko bhi ishq ka da.ava paida
ek afsana naya tum ne suna mere ba.ad
ham ne dekha nahin us zarf ka piine vaala
shisha karta hai ye saaqi se gila mere ba.ad
meri hasti se qayamat ke uThe hain fitne
chhup ke parda men koi rah na saka mere ba.ad
zulf khole hue rote hain vo pa.in-e-mazar
jazb-e-ulfat ne baḌa kaam kiya mere ba.ad
ḳhak-e-turbat se miri log shifa paate hain
maraz-e-ishq ki nikli hai dava mere ba.ad
ab vo aram kahan ghair ke virane men
shab-e-furqat hai giraftar-e-bala mere ba.ad
barq ne rakkha hai derina ta.alluq qaa.em
ashiyana men mire phuul paḌa mere ba.ad
TukḌe hota hai jigar sun ke mohabbat ka bayan
koi sunta nahin bulbul ki sada mere ba.ad
shaiḳh-e-makka ne paḌha.i hai janaze ki namaz
log samjhe mujhe kya janiye kya mere ba.ad
kyuun baḌhe un ka qadam gor-e-ghariban ki taraf
haath aaya hai unhen uzr-e-hina mere ba.ad
nau-giraftar-e-bala ek mira dam nikla
dam-e-sayyad men koi na phansa mere ba.ad
mujh se badnam hue shisha-o-jam-o-sahba
kya kahegi mujhe maḳhluq-e-ḳhuda mere ba.ad
fatiha kaun paḌhe qabr ko Thukrate hain
un ko sujhi hai qayamat ki ada mere ba.ad
malak-ul-maut se uljhenge vo ye Dar hai mujhe
dekhiye kis pe chale tegh-e-ada mere ba.ad
be-hijabana uTha dijiye chehre se naqab
aur ab kaun hai mushtaq-laqa mere ba.ad
mere phulon se bhi daman ko bachaya us ne
log samjhe hain taghaful ko haya mere ba.ad
bul-havas ishq ke parde men numudar hue
ab kahan sheva-e-taslim-o-raza mere ba.ad
zab.h ke vaqt bhi qatil ko dua.en di hain
qatre qatre se Tapakti hai vafa mere ba.ad
zulf khole hue aa.e ho saf-e-matam men
ḳhuub sujha amal-e-radd-e-bala mere ba.ad
jaan dete hain shahadat ki tamanna men gharib
lab-e-qatil pe ye jaari hai sada mere ba.ad
kakul-e-saqi-e-kausar ka tasavvur ban kar
qabr par aa.i hai rahmat ki ghaTa mere ba.ad
guftugu raat ye thi hashr bapa kab hoga
baḌh ke ‘rasiḳh’ ne sar-e-bazm kaha mere ba.ad
Leave a Reply