mujh ko kabhi bhi un se shikayat hui nahin
shayad isi liye to mohabbat hui nahin
ghairon se mehrbani ki ummid kya karen
ham par to aap ki bhi inayat hui nahin
vo log kuche kuche bhatakne lage hain aaj
jin ko khud apne ghar se bhi chahat hui nahin
ham hi to the jo vaqt pe hi kaam aa gae
achchha hua ki ham se adavat hui nahin
main ne kabhi kisi ka dukhaya nahin hai dil
mujh ko kabhi kisi se nadamat hui nahin
tufan-e-bad-o-baran men sab bah gaya ‘kiran’
barsat ab ki bais-e-rahmat hui nahin
Leave a Reply