dikhave ke liye elan-e-faiz-e-am hota hai
magar ik ḳhaas hi halqa men daur-e-jam hota hai
mo.arriḳh yuun jagah deta nahin tariḳh-e-alam men
baḌi qurbaniyon ke ba.ad paida naam hota hai
usi ko sochna paḌti hain tadbiren riha.i ki
jo taa.ir jurm-e-azadi men zer-e-dam hota hai
habab-e-bahr ki surat ubharne ki zarurat kya
numud-e-be-mahal ka jab bura anjam hota hai
koi sarshar ho jaa.e koi ik buund ko tarse
inhin baton se saaqi mai-kada badnam hota hai
kahin sabze ko raunda ja raha hai lahlahane par
kahin phulon ka rang-o-bu pe qatl-e-am hota hai
zaban kyuun kholte ho jurm ye duniya hai ulfat ki
isharon hi isharon men yahan sab kaam hota hai
Leave a Reply