meer-hasan

Aan Kar Gham-Kada-E-Dahr Mein Jo Baithe Hum

aan kar gham-kada-e-dahr men jo baithe ham

shama saan apne taiin aap hi ro baithe ham

ishq ke haath se kashti-e-shikasta ki tarah

aap apne taiin ro ro ke Dubo baithe ham

gar yahi tere ishare hain to majlis se tiri

kui na kui aa ke utha devega go baithe ham

tum jo uthne ko hue the to chale the ham bhi

ab jo yuun aap ki marzi hai to lo baithe ham

siina khali nahin hota hai na thamte hain ashk

kab se rote hain dil-e-khun-shuda ko baithe ham

ghair kahte hain ki ham baithne devenge na yaan

ab to is zid se jo kuchh hove so ho baithe ham

ashk aankhon se to maadum hue the kad ke

haath ab girya-e-khuni se bhi dho baithe ham

aur to kuchh nahin yaan itna khafa hote ho kyuun

kya hua aap ke nazdik jo ho baithe ham

aarzu dil ki bar aai na ‘hasan’ vasl men aur

lazzat-e-hijr ko bhi muft men kho baithe ham

More Poems

Leave a Comment