Osama Khalid
jahan-e-girya jo aadam ko ḳhuld ka dukh hai
isi lihaz se dharti hava ḳhala dukh hai
kabhi firaq ki raton men aa.ina dekhun
to ḳhud se kahta huun dekho ye aa.ina dukh hai
shadid rona to andar ka habs ghuTna hai
khichao hansne se paḌta hai qahqaha dukh hai
zamin gol hai meri vafat ne khola
ki dost ammi se kahte the ye baḌa dukh hai
main banjh peḌ huun saaya na phal mire uupar
mujhe samay de kabhi puchh mujh ko kya dukh hai
tamam ḳhushiyan ikaTThi thiin ek dukh ke gird
unhen dhakel ke chiḳha haTo mira dukh hai
main ḳhud se jang men haara hua sipahi huun
ki jis ka rabta number ata-pata dukh hai
Leave a Reply