Fuzail Jafri
chehre makan raah ke patthar badal ga.e
jhapki jo aankh shahr ke manzar badal ga.e
shahron men hansti khelti chalti rahi magar
jangal men bad-e-sub.h ke tevar badal ga.e
haan is men kamdev ki koi ḳhata nahin
raste vafa ke saḳht the dilbar badal ga.e
vo andhiyan chali hain sar-e-dasht aarzu
dil bujh gaya vafaon ke mehvar badal ga.e
phuTi kiran to jaag uThi zindagi ‘fuzail’
sunsan raston ke muqaddar badal ga.e
Leave a Reply