bazar-e-jihalat men suḳhan bech raha huun
ye giit ye naghmat ye fan bech raha huun
hai koi ḳharidar to avaz laga.e
roTi ke evaz sher-o-suḳhan bech raha huun
kya daam lagate ho chalo tum hi batao
sachcha.i ka anmol ratan bech raha huun
purkhon ne banaya tha jise laakh jatan se
tahzib-o-adab ka vo bhavan bech raha huun
tum Thiik hi kahte the tijarat nahin asan
ab kaun ḳharide jo suḳhan bech raha huun
Leave a Reply