kahan savab kahan kya azaab hota hai
mohabbaton men kab itna hisab hota hai
bichhad ke mujh se tum apni kashish na kho dena
udaas rahne se chehra kharab hota hai
use pata hi nahin hai ki pyaar ki baazi
jo haar jaae vahi kamyab hota hai
jab us ke paas ganvane ko kuchh nahin hota
to koi aaj ka izzat-maab hota hai
jise main likhta huun aise ki khud hi padh paanv
kitab-e-zist men aisa bhi baab hota hai
bahut bharosa na kar lena apni ankhon par
dikhai deta hai jo kuchh vo khvab hota hai
Leave a Reply