achchha jo bura aap ne chaha na kisi ka
divana kyuun na ho dil-e-farzana kisi ka
maana ki hai us shoḳh se yarana kisi ka
dam bharta hai phir kyuun dil-e-divana kisi ka
lau us ki faqat sham-e-risalat se lagi hai
mushtaq nahin bazm men parvana kisi ka
aate nahin is rashk se vo ḳhana-e-dil men
abad na ho jaa.e ye virana kisi ka
ai dil hai abas us se tamanna-e-mulaqat
vo shoḳh na hoga kabhi apna na kisi ka
un ke dur-e-dandan ke tasavvur men shab-e-hijr
har ashk dam-e-girya hai durdana kisi ka
jaane se tire aa.e mire dil men gham-o-ranj
pahle to siva tere guzar tha na kisi ka
hargiz na sune vo gul-o-bulbul ki kahani
ho gosh-zad us ke agar afsana kisi ka
bole vo hujum-e-gham-o-hasrat ko jo dekha
kyuun is men rahen ham ki hai kashana kisi ka
kuchh duur nahin manzil-e-maqsud yahan se
de saath agar himmat-e-mardana kisi ka
aapas men jhagaḌte hain agar shaiḳh-o-barahman
masjid hi kisi ki hai na but-ḳhana kisi ka
phir gulshan-e-jannat ki na ho aarzu us ko
maskan hai agar kucha-e-janana kisi ka
allah re rutba ki hua qais qadam-bos
sahra men jo pahuncha koi divana kisi ka
bhaTTi men jo ho dafn koi bada-kash-e-rind
gumbad abhi ho ja.ega ḳhum-ḳhana kisi ka
allah re tajahul mire ahbab se puchha
divana hai kya ‘sabir’-e-farzana kisi ka
Leave a Reply