maza hai imtihan ka aazma le jis ka ji chahe
namak zakhm-e-jigar par aur daale jis ka ji chahe
jigar maujud hai to vo bana le jis ka ji chahe
gala hazir hai khanjar aazma le jis ka ji chahe
agar hai husn ka daava mah o khurshid donon men
kaf-e-pa se tumhare munh mila le jis ka ji chahe
ye musht-e-ustukhvan apne kisi ke kaam men aaen
huma ho ya sag-e-dildar kha le jis ka ji chahe
agar hai zindagi baaqi to ham hasrat nikalenge
dil-e-pur-arzu par khaak daale jis ka ji chahe
faqiron ko nahin kuchh zinat-e-duniya se matlab hai
main khush kambal men huun odhe doshale jis ka ji chahe
jo raushan dil men un ki raushni chhupti nahin hargiz
mah-e-taban pe sahab khaak daale jis ka ji chahe
shikayat mujh ko donon se hai naseh ho ki vaaiz ho
na samjha huun na samjhun sar phira le jis ka ji chahe
main huun barg-e-khizan-uftada main mardud dahqan huun
gira huun un ki nazron se utha le jis ka ji chahe
nahin hota kabhi ab-e-ravan par shak najasat ka
mire ashkon ke dariya men naha le jis ka ji chahe
chaman men gul ke murjhane se ‘agha’ ho gaya sabit
bisan-e-ghuncha dam bhar muskura le jis ka ji chahe
Leave a Reply