Tera KHayal Hai Ab Chashm-E-Tar Ka Zawiya Dekh

Zebunnisaa Zaibii

tira ḳhayal hai ab chashm-e-tar ka zaviya dekh

tire baghair bhi zinda huun mera hausla dekh

idhar sitam ki hava hauslon ke diip udhar

mayan-e-batil-o-haq hai bapa jo ma.arka dekh

dilon ke khel men rusva.i bhi hai gham bhi hain

ye pahle soch le phir kar koi muahida dekh

dil-o-nigah men rakh sirf manzil-e-maqsud

kiya hai azm safar ka to phir na fasla dekh

tujhe kaha tha ki itni na Dhiil de dil ko

so ab rukega kahan ḳhvahishon ka qafila dekh

abhi hai vaqt yahin saath chhoḌ de mera

bahut kaThin hai miri jaan vafa ka rasta dekh

vo dekh samne raushan charagh-e-manzil hai

hai ‘zebi’ azm safar ka to phir na fasla dekh