pata kaise chale duniya ko qasr-e-dil ke jalne ka
dhuen ko rasta milta nahin bahar nikalne ka
bata phulon ki masnad se utar ke tujh pe kya guzri
mira kya main to aadi ho gaya kanTon pe chalne ka
mire ghar se ziyada duur sahra bhi nahin lekin
udasi naam hi leti nahin bahar nikalne ka
chaḌhega zahr ḳhushbu ka use ahista ahista
kabhi bhugtega vo ḳhamyaza phulon ko masalne ka
musalsal jagne ke ba.ad ḳhvahish ruuTh jaati hai
chalan sikha hai bachche ki tarah us ne machalne ka
zar-e-dil le ke pahuncha tha mata-e-jan bhi kho baiTha
diya us ne na mauqa.a bhi kaf-e-afsos milne ka
ḳhushi se kaun karta hai ghamon ki parvarish ‘sajid’
kise hai shauq logo dard ke sanche men Dhalne ka
Leave a Reply