jis din se uTh ke ham tiri mahfil se aa.e hain
lagta hai lakhon kos ki manzil se aa.e hain
mil kar gale ham apne hi qatil se aa.e hain
kya saaf bach ke maut ki manzil se aa.e hain
rahen hain ashiqi ki nihayat hi pur-ḳhatar
tere huzur ham baḌi mushkil se aa.e hain
zulfon ke pech-o-ḳham men paḌen ham to kya paḌen
ham tang ḳhud hi apne masa.il se aa.e hain
bazm-e-butan men shaiḳh sukun ke ḳhayal se
daman chhuḌa ke zikr-o-navafil se aa.e hain
ye haq parastiyan miri marhun-e-kufr hain
ye din to faiz-e-sohbat-e-batil se aa.e hain
kuchh vahshiyon pe rang baharon se the ‘alim’
kuchh ehtimam tauq-o-salasil se aa.e hain
Leave a Reply