saare ushshaq se ham achchhe hain
haan tire sar ki qasam achchhe hain
uljha hi rahne do zulfon ko sanam
jo na khul jaa.en bharam achchhe hain
koi janchta nahin us but ke siva
aur bhi yuun to sanam achchhe hain
hashr tak mujh ko jala.e rakkha
ye hasinon ke bhi dam achchhe hain
bahs ho jaa.e to sab par khul jaa.e
hain bhale aap ki ham achchhe hain
ghair ki kuchh nahin shirkat is men
ham ko ye tere sitam achchhe hain
jiite hain arzu-e-qatl men ham
dam tire tegh-e-do-dam achchhe hain
na hua ka.abe ka didar nasib
ham se ahu-e-haram achchhe hain
ḳhuub hai vaqt jo kaT jaata hai
jo guzar jaate hain dam achchhe hain
puchhte kya hain mizaj-e-‘kaifi’
aap ka lutf-o-karam achchhe hain
Leave a Reply