ba-hosh vahi hain divane ulfat men jo aisa karte hain
har vaqt unhi ke jalvon se iman ka sauda karte hain
ham ahl-e-junun men bas yahi me.araj-e-ibadat hai apni
milta hai jab un ka naqsh-e-qadam ham shukr ka sajda karte hain
milte hain nazar hosh uḌte hain masti bhi barasne lagti hai
ma.alum nahin vo kaun si mai ankhon se pilaya karte hain
paate hain vahi maqsud-e-nazar milti hai unhen manzil un ki
jo un ki tamanna men har dam ḳhud apni tamanna karte hain
hai shauq yahi mastanon ko hai sharm yahi divanon ko
siine se laga kar yaad us ki us shoḳh ki puuja karte hain
mayus na ho nadan na ban dil soz-e-alam se jalne de
jo chahne vaale hain un ke vo aag se khela karte hain
ham kis ke hue dil kis ne liya vo kaun hai kya hai kya kahiye
ye raaz abhi tak khul na saka ham kis ki tamanna karte hain
maiḳhana-e-hasti men ham ne ye rang naya dekha saaqi
jin bada-kashon ko hosh nahin vo hosh ka da.ava karte hain
ye kaisi jafa.en hoti hain ye kaisi ada hai un ki ‘fana’
ham husn ka parda rakhte hain vo ishq ka da.ava karte hain
Leave a Reply