Bhul Kar Bhi Idhar Nahin Aata

bhuul kar bhi idhar nahin aata

vo kabhi raah par nahin aata

kis ka jalva nazar se guzra hai

ki mujhe kuchh nazar nahin aata

charkh-e-gardish se thak gaya shab-e-hijr

din nikalta nazar nahin aata

bah gaya dil to gham nahin ai chashm

kaam men kya jigar nahin aata

huun shab-e-vasl is qadar be-khud

bim-e-marg-e-sahar nahin aata

kis gali men chala huun marne ko

shauq men kuchh nazar nahin aata

tera kucha agar bahisht nahin

ja ke kyuun nama-bar nahin aata

pher deni chhuri to aati hai

lutf-e-sayyad agar nahin aata

nau-giraftari-e-musibat dekh

ham ko naala bhi kar nahin aata

dil ko kya jaane kya hua ‘salik’

chain kyuun rat-bhar nahin aata

Leave a Comment