ishq ki chausar kis ne kheli ye to khel hamare hain
dil ki baazi maat hui to jaan ki baazi haare hain
kaise kaise lakht-e-jigar hain kya kya dil ke paare hain
aise laal kahan duniya men jaise laal hamare hain
is ko maara us ko maara ye bismil vo tuut gaya
nok palak valon se dariye qatil un ke ishare hain
chhalni chhalni dil bhi jigar bhi rauzan rauzan siina bhi
ek nigah-e-naz ne teri tiir hazaron maare hain
phunk raha hai soz-e-nihani kaun is aag pe daale paani
dil ki lagi ne aag laga di daagh nahin angare hain
lala-rukhon men umr gizari dekhi un ki fasl-e-bahar
aaj bhi gul se galon vaale mujh ko ‘mubarak’ pyare hain
Leave a Reply