akhtar-hoshiyarpuri

Na Jab Koi Sharik-e-Zat Hoga

na jab koi sharik-e-zat hoga

mira ham-zad mere saath hoga

gharon ke band darvazon men raushan

vahi ik zaḳhm-e-ehsasat hoga

na yuun dahliz tak aao ki bahar

gali men fitna-e-zarrat hoga

kurede jaao yuun hi raakh dil ki

kahin to sho.ala-e-jazbat hoga

dariche yuun to khul sakte nahin the

havaon men kisi ka haat hoga

kitabon men milenge sher mere

mira gham raunaq-e-safhat hoga

yahi din men dhalegi raat ‘aḳhtar’

yahi din ka ujala raat hoga

More Poems

Leave a Comment