uThae Dosh Pe tariKH-E-Hadsat-E-Jahan

Ishrat Zafar

uTha.e dosh pe tariḳh-e-hadsat-e-jahan

guzar raha hai dayar-e-hayat se insan

bichha raha hai fazaon men dam-e-kahkashan

tire gudaz badan ka tabassum-e-pinhan

labon pe laakh laga.e koi sukut ki mohr

magar ḳhamoshi na hogi jarahaton ki zaban

bhaḌak uThe na kahin phir charagh-e-zaḳhm ki lau

sambhal sambhal ke sunao hadis-e-shahr-e-butan

dhuan dhuan si mili hai faza-e-shahr-e-junun

bujhi hai raat ga.e jab bhi mash.al-e-zindan

ye vo jahan hai ki har shahr-e-sang-o-ḳhisht ke ba.ad

qadam qadam pe hai ‘ishrat’ dayar-e-shisha-garan