tujh se bosa main na manga kabhu Darte Darte
dekhiye ab-e-baqa pa.unga marte marte
kya hai insaf ki juun sub.h tu hansta hai hanuz
mar chuka sham.a sa main girya hi karte karte
ab to munh de mujhe ai nur-e-nazar a.ina-var
gar ga.iin palken sarishk aankh se jhaḌte jhaḌte
na hua dard sar-e-naz ka sandal tujhe haa.e
ghus gaya matha tire paanv pe dharte dharte
jab se dikhla gaya jan-baḳhsh tu jalve ki bahar
mar ga.iin bulbulen gulzar se girte girte
ham divanon ko nahin hajat-e-zindan tiflon
chhup ga.e Dher men ham sang ke paḌte paḌte
zarra kar mahr tu ‘uzlat’ pe ki manind-e-hilal
ḳhali huun aap se din hijr ke phirte phirte
Leave a Reply