vo rokta hai mujhe shahr men nikalne se
bhaḌak uThun na kahin andhiyon men jalne se
ye tarz-e-talḳh-nava.i kuchh itni sahl nahin
zaban pe aable paḌ jaa.en sach ugalne se
ḳhala hava.i saharon se pur nahin hota
buland hota hai insan kahin uchhalne se
ḳhud apne-ap se poshida rahna na-mumkin
nazar badalti nahin aa.ina badalne se
khaḌa huun main kisi girti hui fasil pe kya
tavazun aur bigaḌne laga sambhalne se
baḌe ḳhulus se mangi thi raushni ki dua
baḌha kuchh aur andhera charagh jalne se
luTa diya jinhen jiiti hui raqam ki tarah
vo din palaT to na a.enge haath milne se
chhaTegi kaise ‘muzaffar’ siyahi qismat ki
nikal to aa.ega ḳhurshid raat Dhalne se
Leave a Reply