hudud-e-jalva-e-kaun-o-makan men rahte hain
na jaane ahl-e-nazar kis jahan men rahte hain
hamen to mausam-e-gul ne hi kar diya rusva
suna hai log salamat khizan men rahte hain
ayaan hai un ke sitam se hamara zauq-e-niyaz
ham aag ban ke mizaj-e-butan men rahte hain
kahan talash karegi hamen bahar ki ham
kabhi qafas men kabhi ashiyan men rahte hain
vo raaz jin ka labon ne na ehtiram kiya
barahna ho ke dil-e-raz-dan men rahte hain
ghurur-e-hikmat-o-danish men jhumne vaalo
kuchh ahl-e-dil bhi isi khak-dan men rahte hain
‘qatil’ arz-e-vatan men bhi huun main khak-basar
mire nasib kahin asman men rahte hain
Leave a Reply