Ghair Ko Munh Laga Ke dekh Liya

Dagh Dehlvi

ghair ko munh laga ke dekh liya

jhuut sach aazma ke dekh liya

un ke ghar ‘dagh’ ja ke dekh liya

dil ke kahne men aa ke dekh liya

kitni farhat-faza thi bu-e-vafa

us ne dil ko jala ke dekh liya

kabhi ghash men raha shab-e-vaada

kabhi gardan utha ke dekh liya

jins-e-dil hai ye vo nahin sauda

har jagah se manga ke dekh liya

log kahte hain chup lagi hai tujhe

hal-e-dil bhi suna ke dekh liya

jaao bhi kya karoge mehr-o-vafa

bar-ha aazma ke dekh liya

zakhm-e-dil men nahin hai qatra-e-khun

khuub ham ne dikha ke dekh liya

idhar aina hai udhar dil hai

jis ko chaha utha ke dekh liya

un ko khalvat-sara men be-parda

saaf maidan pa ke dekh liya

us ne subh-e-shab-e-visal mujhe

jaate jaate bhi aa ke dekh liya

tum ko hai vasl-e-ghair se inkar

aur jo ham ne aa ke dekh liya

‘dagh’ ne khuub ashiqi ka maza

jal ke dekha jala ke dekh liya