raat ke dar pe ye dastak ye musalsal dastak
amad-e-sub.h-e-farozan ka pata deti hai
phunk Dalegi ye ik roz qaba-e-sayyad
atish-e-gul ko saba aur hava deti hai
tirgi-zadon se kab nuur ka sailab thame
faisla vaqt ka tariḳh suna deti hai
aanch aati hai sitaron se jo kuchh pichhle pahar
ḳhvab-e-shirin se nigaron ko jaga deti hai
kitni nadida baharon ki tamanna-e-javan
daman-e-jan men mire aag laga deti hai
sina-e-sang men betab hai vo kavish-e-shauq
jo haqiqat ko bhi ḳhvabon ki ziya deti hai
sham-e-mehrab-e-vafa ban ke hayat-e-rusva
dil-nigari ka miri kuchh to sila deti hai
Leave a Reply