gum kar den ik zara tujhe ḳhvabon ke shahr men
nukte kuchh aise DhunD kitabon ke shahr men
divangi ki aisi milegi kahan misal
kanTe ḳharidta huun gulabon ke shahr men
a.ine bolte hain to ye bhi bata.enge
kya be-hijab huun main hijabon ke shahr men
nakamiyon ki aag men tapti hain ḳhvahishen
jalti hai meri ruuh azabon ke shahr men
is ahd-e-na-shanas men iḳhlas ki talab
gauhar ki justuju hai hababon ke shahr men
har manzar-e-hasin pe hai ik chadar-e-ghubar
kya main bhaTak raha huun sarabon ke shahr men
‘anvar’ hamen to aaj bhi fikr-o-nigah ke
bosida ghar mile hain nisabon ke shahr men
Leave a Reply