Mirza Raza Barq
rang se pairahan-e-sada hinai ho jaae
pahne zanjir jo chandi ki talai ho jaae
khud-faroshi ko jo tu nikle ba-shakl-e-yusuf
ai sanam teri kharidar khudai ho jaae
khat-e-toam ki tarah ashiq o mashuq hain ek
donon bekar hain jis vaqt judai ho jaae
tangi-e-gosha-e-uzlat hai bayan se bahar
nahin imkan ki chyunti ki samai ho jaae
yahi har uzv se aati hai sada furqat men
vaqt ye vo hai juda bhaai se bhaai ho jaae
apni hi aag men ai ‘barq’ jala jaata huun
unsur-e-khak ho turbat jo ladai ho jaae
Leave a Reply